CLICK HERE FOR BLOGGER TEMPLATES AND MYSPACE LAYOUTS »

الثلاثاء، 8 يونيو، 2010

أهالـينا

اهالـــــينا






استمرارا فى الحديث على الحب على النت



دلوقتى احنا وصلنا ان الطرفين



كل واحد فيهم صادق اوى فى مشاعره



واتعرفوا على بعض بجد



والشاب طلب من البنت انه يتقدم لاهلها





ياترى البنت فى الوقت ده هتقول ايه لاهلها



هتقول انا اتعرفت على الشاب ده من على النت



لازال موضوع النت شئ مجهول


لكتير من البيوت العربيه والمصريه




حتى الشاب هيقول لاهله عاوز اخطب



ياترى هيقول اتعرفت على البنت فين وازاى




خاصة لو كان البنت والولد





كل واحد فيهم من مدينه مختلفه او حتى دول مختلفه





دى بقى مشكله تانيه



ياترى هيضطروا انهم يكدبوا




او يقولوا الحق



لو الولد قال لاهله اتعرفت بها على النت



هتلاقى اللى يقوله زى ما كنت بتكلمك اكيد بتكلم غيرك





او بعد الخطوبه ممكن تتكلم مع حد تانى وتلاقيه افضل منك



يحاول الشاب يقنع اهله انه عرفها كويس



وهيسال عنها وعن اهلها قبل الارتباط



لكن برضه الاهل هيفضلوا واقفين فى طريق



هذه الزيجه لانها بالنسبه لهم حاجه مجهوله



ياترى الشاب المفروض يكدب بقى او يقول الحق





مشكلة الشاب فى الحاله دى لاتقل عن مشكلة البنت



هتقول لاهلها اتعرفت عليه ازاى ؟؟؟




تعالوا نفكر مع بعض ونقول اقتراحات




ازاى الشاب يقنع اهله وازاى البنت برضه تقنع اهلها


32 التعليقات:

samy يقول...

زهراء

أنتى فتحتى قضية حقيقى كبيرة ومهمة للطرفين

بس لما هيبقى فى تعارف اكتر ممكن يكون فى مقابلة

فى تعارف اكتر يعنى مثلا انا فى حكايتى فى اصدقاء مشتركين

ممكن اقدر اتكلم واقول اتعرفت عن طريق الصديق الفلانى وهكون مكدبتش لان دة حقيقى

لان بجد الأهل ممكن ميكنوش مقتنعين بدة اللى هو التعرف عن طريق النت
للأسباب اللى انتى قلتيها

ودة لازم نحطة فى أعتبرنا يعنى لازم نعرف أزاى نوضح الأمور ليهم واحدة واحدة لان برضة لازم نعذرهم لخوفهم علينا

وكمان لكل حالة من الحالات ليها وضعها وظروفها وهما يقدرو يقيمو ازاى يوصلو دة لأهلهم بدون ما يسيئو التصرف

مش عارف ممكن اكون رايى مفدش قوى بس يعنى انا حبيت اشارك فى الموضوع المهم دة

شكرا جدا للفرصة دى

هوبتي يقول...

الموضوع دا شاااائك جدا يا زهراء ومهم قوي ...

بس برغم كده انا ضد الحب علي النت لاني مش بقتنع بيه

أبو حسام الدين يقول...

السلام عليكم

أولا أرحب بنفسي في مدونة بيتنا، والتي صرت عضوا مشاكا فيها، وأوجه شكري الخالص إلى الأخت الكريمة ليلة شتاء التي تلقيت منها الدعوة، وإلى جميع أعضاء المدونة.
----------------
أما موضوع الحب في الأنترنيت فأظن أنه قليلا وقليلا جدا ما ينجح، وقليلا ما تكون نهايته الزواج... حب الأنترنيت هو كمخذر أو إن شئتم أن نقول هو نزوة عابرة.
ثم مَنْ مِن أسرنا العربية والمسلمة من توافق بمثل هذا الزواح، يكاد يكون ذلك منعدما...
أنا رأيي ليس هناك أحسن من أن يختار الشاب أو الشابة شريكهما من الواقع المشهود، فالأنرنيت شيء في نظري نسبي لا يمكن الإعتماد عليه.

شكرا لكم.

محمود المصرى يقول...

انتى لازم تبعدى عن النت لاْن مينفعش تعرفى الشخص الى قدامك كده من غير متشوفيه وتعرفيه طبعاَ عن طريق الطرق المشروعه الى هى الخطوبه انتى تعرفى منين ان كل الكلام الى بيقولهولك من جواه ما يمكن بياخده من ده شويه ون ده شويه وثانياَ وده الاْْْْْْْهم لازم تبعدى الكذب والبنى ادم الى يخليكى تعملى كده يبقى عمره ما بيحبك لاْن كده لازم تفهمى ان طبعه الكدب وكل ما بنى على باطل فهو باطل
اتمنى نكون اْصدقاء وتيجى تزورينى ومتنسيش التعليق لاْن راْيك يهمنى
اخوكى
محمود المصرى

أم الخـلـود يقول...

الحب في النت ومسألة الإقناع قد تنجح هذه الأمور عند المطلقين والأرامل فقط لأنه لا يحتاج إلى تدخل في ارتباط الثاني .. أما الارتباط الأول فهو يحتاج إلى تخطيط مطول وطول نفس من كلا الطرفين الشاب والبنت لأهاليهم.

الشـوكة الــنـاعـمـة يقول...

بصى هو من الاحسن انهم مايقولوش الحقيقه
لانهم هايتحطوا فى مواقف كتير صعبه
ولو انى مااحبذش الجواز بواحد عن طريق النت حتى لو كان صادق فعلا
بس عموما
فى حل كويس
ممكن الولد يجى مثلا البلد اللى فيها البنت على انه جاى سياحه رايح يزور حد من صحابه ويتفسحوا ويقول لااهله بعد مايرجع انوا قابل بنت وحبها وعاوز يرتبط بيها
والبنت كمان تقول لاهلها فى واحد عاوز يتقدم لى هو شافنة وطلب منى يجى البيت
كده يعنى
تحياتى

زهــــراء يقول...

samy

-*-**

ســـــــامى

والله يا سامى انا حاولت انى اكلم نفس الموضع اللى بدأه ايهاب " صدفه جميله " وهو لظروف شغله مش موجود الايام دى يرجع بالسلامه ان شاء الله قولت اكمل فى نفس الموضوع علشان نبقى قولنا كل حاجه فى الموضوع ده ...
موضوع الاصدقاء المشتركين فعلا ممكن تكون فكره وقبل كده استخدمتها مع احد صديقاتى ولانى كنت على علم بالطرفين اقترحت انهم يقولوا انهم عرفوا بعض عن طريقى ..
الاهل صعب اوى يقتنعوا بموضوع النت اعرف بنت كانت مرتبطه بشاب وطلب انه يجى لاهلها ولما كلمت والدتها قررت انها تشيل النت من البيت خالص وطبعا رفضت الموضوع كله ...
اضم صوتى الى صوتك كل حاله ولها وضع خاص

بجد باشكرك لتفاعلك معنا

زهــــراء يقول...

هوبتي
-*-*-

احترم وجهة نظرك
اهلا بيكى وبكل اهل الاردن
اتمنى نشوفك معنا على الدوام

زهــــراء يقول...

أبو حسام الدين

-*-*-*-*-*-*

وعليكم السلام ورحمة الله وبركاته

ارحب بحضرتك طبعا معنا فى بيتنا
اضم شكرك الى شكرى لان ليلة شتاء من الناس الغاليه على قلبى اوى اوى



عجبنى رأى حضرتك اوى واضيف على كلام حضرتك ان الواحد بقى دلوقتى مش يثق فى الناس اللى بيتعامل معاهم وجها لوجه فمابالك اننا نتعامل من خلال شاشه وعارف حضرتك نظام لا اكذب ولكنى اتجمل

الاسر العربيه ترفض هذا النوع من الارتباط ولاسباب كتيره ومعاهم كل الحق كل اب وكل ام من حقهم يخافوا على اولادهم .....

احترم راى حضرتك وبيتنا تشرف بوجود سيادتك معنا

زهــــراء يقول...

محمود المصرى

-*-*-*-*-*

اولا عاوزه اقول لحضرتك حاجه بسيطه وهو ان البوست مش تجربه شخصيه وباخد راي الناس فيها لكن هو موضوع مفتوح من فتره عندنا هنافى المدونه والبوست تكمله للحديث عن الحب على النت
لو كان الموضوع شخصى الحمد لله انا عندى المقدره انى اخد فيه القرار لوحدى ...

حضرتك اتكلمت فى الكومنت بصفه شخصيه وكأنى اوجه السؤال لاى حد يدخل المدونه يقول رأيه

حضرتك قولت حاجه انى لازم اشوف الشخص بالطرق المشروعه واعرفه فى فترة الخطوبه والحمد لله الكذب بقى منتشر فى المجتمع بنسبه اكتر من 90 % يعنى مش موضوع النت او الطرق المشروعه هو اللى بيحدد مين الصح ومين الغلط او مين الصادق ومين اللى كداب

زهــــراء يقول...

أم الخـلـود

-*-*-*-*-*

اهلا بحضرتك معنا

اى ارتباط سوءا كان الاول او التانى لازم يكون فيه تخطيط ودراسه لجوانب الطرفين
احترم وجهة نظر حضرتك
شرفتى ونورتى

زهــــراء يقول...

الشـوكة الــنـاعـمـة

-*-*-*-*-*-*-*-*-*-*-*

يا اهلا يا اهلا

يعنى بيدوا حياتهم بكذبه امممممممم

الموضوع عن جد صعب وحلو برضه اقتراحك
تسلمى وتسلم افكارك

فى انتظارك على الدواااااااااااام معنا ان شاء الله

love is life يقول...

السلام عليكم
احيكى على الموضوع المهم ده
بس من وجهه نظرى ان الحب عن طريق نت
ضعيف ولا يمكن ان نتاكد منه
لذلك انا لا افضل انا نتاكد من صدق المشاعر الا بالمقابله وجها لوجه
ده بيبن الشخصيه اكتر وبيوضح التفاهم بين الطرفين اكتر واكتر
هوه ممكن يحصل اعجاب بس حب ما افضلش
لانك مش ضامن الشخص اللى قدامك
حتى لو كان صادق وانا اعرف منين
فلازم يكون فى لقاء وده افضل بكتير
وده من وجهه نظرى المتواضعه
تقبلى مرورى

GeHaD HaNy يقول...

السلام عليكم
والله انا رأى انه الحب من على النت بيحتاج شخصين عندهم عقل شويه عشان يقدريتحكم فى مشاعره ويقدر يقدر اللى قدامه كويس ..
بس النت مجرد وسيلة للتعرف لكن مش هو الطريقة نفسها..
وفى حكاية انهم يقولوا او لا
بصراحة لو قال غير الحقيقة هيكون عارف من جواه انه اللى بعمله كان غلط !!
فالاحسن يقول الحقيقة .. وكده كده فتره الخطوبة هى اللى هتعرفه على الشخص كويس

زهــــراء يقول...

love is life

-*-*-*-*-*

وعليكم السلام وحرمة الله وبركاته

والله موضوع الحب على النت اختلفت فيه الاقوال والاراء ..

احترم وجهة نظرك جدا جدا
والله كمان العشره والمقابله مش توضح المشاعر يمكن لان الناس بقيت بتمثل على بعضها وده شئ صعب بجد
ربنا يكفينا شر الممثلين اللى فى الحياه

فى انتظارك على الدوووووووووام

زهــــراء يقول...

GeHaD HaNy

-*-*-*-*

وعليكم السلام ورحمة الله وبركاته

صح كلامك اى تجربة حب لازم تحتاج عقل مش مجرد ان الواحد يفكر بمشاعره وبس او يفرك بقلبه وبس ....

النت فعلا مجدر وسية تعارف وممكن تكون فى نسبة صدق او كدب كمان

فوترة الخطوبه فى بعض الاحيان بتوضح حاجات وبرضه فى احيان اخرى مش توضح اى حاجه
نورتى وشرفتى فى انتظارك على الدواااااااااام

مدونه ما كفايه بقى يقول...

السلام عليكم
اختى كلامك واقعى جدا
انا شوفت قدامى قصص كتير من ناش قريبه منى بنفس الشكل
والمشكله اللى كانت بتقابل الجميع فعلا هيه انا عرفته او عرفتها ازاى
خاصه زى ما بتقولى اذا كان الاتنين من دولتين

مفيش حب عن طريق الكلام او حتى مايك او حتى كاميرا
ده اسمه لعب عيال بجد
بس للاسف مش بيبقوا مدركين انهم بيلعبوا ببعض

كل القصص اللى شوفتها كان الولد بيسحب نفسه فى الاخر كل مره بحجه
شكل

انا عن نفسى كلمت مره شاب من الشات اول ما اتعرف عليا قالى انا اعجبت بيكى ممكن عنوان بيتك عشان اجى اتقدملك

طيب نسمى ده ايه غير انه لعب عيال بجد وهبل زايد عن حده

خلاصه الكلام
مفيش حب من على النت

تحياتى لكى

تقبلينى صديقه لمدونتك

مرايتى يقول...

السلام عليكم ورحمة الله وبركاته

شكرا طبعا زهراء على طرحك لجوانب الموضوع
أنا لسه على رأى عن عدم إقتناعى بحب النت لانه كتير بيبقى معتمد على الكذب ولو صح برضه زى ماقلتى حيضطر يكدب على أهله و هى كمان وأكيد الأهل مش حيقتنعوا بكده وبالنسبه له أكتر حيأثروا عليه من ناحية إنها حتى لو محترمه إزاى كلمتك على النت وهى ما تعرفكش وإنها زى ماكلمتك كلمت غيرك وكمان فى نقطه مهمه لو تم بما إن طبعاالراجل غيوربطبعه حيبقى نقطة الثقه بينه وبينها منعدمه وعلى طول حيبقى شاكك فيها حتى لو إتجوزوا ودى حاجه خطيره جدا
يبقى موضوع بدأ بكدب ومشى بالكذب معقوله دى تبقى بدايه لحياه سليمه ومشاركه طول العمر
موضوع فعلا شائك وله ظروف بتختلف من حد لحد بس الغالبيه بتبقى فيها مشاكل والنادر فعلا إلى بيحصل لأنى ما أنكرش إنى أعرف واحده إتجوزت كده
ربنا يسعد الكل يارب

المجاهد الصغير يقول...

السلام عليكم
معلش انا رفضه المبدء اصلا
ثقى اختى طلما خبئتى شئ عن اسرتك مثل ذلك فانه حرام واعلمى ايضا ان الله ناظرى الله مطلع على....
ومن استعجل شئ قبل اوانه عوقب بحرمانه
بمعنى ان استعجلتى بكلام شخص لا تعرفيه على النت وممكن تقولى انا اعرف كل شئ عنه اقول لكى لا والف لا ليست الحقيقه فانه هدفه الاول والاخير الشات وان استعجلتى وكان من نصيبك ربنا هيحرمك من لزه الكلام الطيب وهدوء البال والسكينه بعد الزواج
جزاكم الله خيرا
ويبقى التواصل

فاروق بن النيل يقول...

زهراء ......
الموضوع ده عادى جدا ممكن ينجح وممكن يفشل وهذا لأنه تعارف سطحى المهم هى ألا
تكون لعبة ولاتوافق على المقابلة خارج المنزل ويجب أن يأتى هو إلى أهلها وعرفها إزاى موش دى المشكلة لأن كثير من الناس بيتقابل الولد مع البنت وبعد مايتفقوا من غير نيت أو شات أو فيسبوك أو خلافه وبيروح لأهل البنت ويقولهم سألت عليها لقيت أخلاقها كويسة وعشان كدة إتقدمت وفى حالات كثيرة بينجح الزواج أو يفشل دى موش بسبب نيت أو خلافه

زهــــراء يقول...

مدونه ما كفايه بقى
-*-*-*-*-*-*


وعليكم السلام ورحمة الله وبركاته

فعلا موضوع الحب على النت بدا ينتشر بين ناس كتير مش مجرد شباب وبس

فعلا موضوع انا اتعرفت عليها ازاى او اتعرفت عليه فين ده مشكله فى حد ذاتها
وحتى لو كانوا الاتنين من مكان واحد برضه ماحدش عاوز يبدأ حياته بالكذب


لو اتكملنا بالعقل فعلا مافيش حاجه اسمها حب عن طريق شاتنج او مايك لكن فى بعض الاحيان الطرفين بيكونوا عندهم رغبه فى الحب ممكن يكون بجد او هزار او حتى علشان عندهم فراااااغ

على فكره مش كل الحوارات لعب لانى شوفت وعاصرت قصص تمت فعلا بالزواج لكنها احوال نادره اوى ...

زى ما فى اولاد بيسحبوا نفسهم برضه فى بنات بعد ما الشاب يتعلق بها بتقرر انها تخلع وتسيبه لانها ممكن تكون فعلا متزوجه بس بتضيع وقت على النت

من اول مره اعجب بيكى على كده انتى ساحره اوى ههههههههههههه طبعا ده واضح انه كذااااااااااب لانه صعب اوى حد يعجب بحد من مجدر كلام او حتى لو شافه مره واتنين وتلاته وهو على اساس الاعجاب قرر انه يخطبك والله حاجه غريبه عجيبه ...


عن جد فرحانه بكلامك ومناقشتك العاقهل جدا جدا ربنا يحفظك
فى انتظارك على الدوااااااااام معنا ان شاء الله

زهــــراء يقول...

مرايتى

-*-*-*


وعليكم السلام ورحمة الله وبركته

اشكرك على كلامك بس احقاقا للحق ان الفكره من البدايه خاضه بصدفه جميله " إيهاب " وحاولت انى اجمع شوية حاجات خاصه بالموضوع علشان نتكلم فيه من كل الجوانب والزوايا وطبعا الموضوع قيمته فى الردود اللى كل واحد بيكتبها ...

طبعا انا عن نفسى محترمه رايك جدا جدا على فكره الكدب ده موضه مش على النت وبس لكن فى الحياه كلها بصفه عامه وقولتها قبل كده واكررها فى نسبه كتيره ماشيه بنظام انا لا اكذب ولكنى اتجمل ....


على فكره انا ضد الكدب من البدايه على الاهل لان الزواج اللى بيقوم على كدبه حتى لو كانت صغيره اكيد هيجى يوم وهو يقولها انتى كدبتى على اهلك وهى كامن ممكن تقوله انا كدبت على اهلى علشان خاطرك وكأنها تضحيه
انتى كمان قولتى على نقطة الثقه ان الرجل ممكن يقول لها اكدي هتكلمى غيرى وممكن تتعرفى على حد افضل منى ولان الرجل الشرقى بطبعه غيور جدا جدا وعنده نوع من حب الامتلاك ...

الموضوع الى حد ما جديد على المجمتعات الشرقيه بصفه عامه والمجمتع المصرى بصفه خاصه ...

اشكرك على رايك وهو محترم جدا وقولتى حاجات فعلا ذات قيمه

زهــــراء يقول...

المجاهد الصغير

-*-*-*-*-*-*

وعليكم السلام ورحمة الله وبركاته

اختى الفاضله احترم رفضك للمبدأ
حضرتك وجهتى الكلام لى بصفه شخصيه ولكن سوف اعتبر انك بتكلمى كل البنات فى شخصى رغم انى اكررها انها مش تجربه شخصيه وباخد الرأى فيها ده موضوع من اول ما فتحنا المدونه واحنا نتناقش فيه وهو الحب على النت وبنحاول اننا نتكلم فى كل الجوانب فى هذا الموضوع ...

الكذب شئ مرفوض من البدايه لانه ما بنى على باطل فهو باطل
اختى الفاضله بيكونوا متزوججين وهى لا تعرف عنه اى شئ وهو كمان يعنى مش النت بس اللى بيعرفوا منه اى حاجه لكن الواقع العملى والحياه كمان الواحد شاف يها تجارب كثيره
اشكرك على الرساله التى تم توجييها الى كل الفتيات
شرفتى ونورتى

زهــــراء يقول...

فاروق بن النيل


-*-*-*-*-*-*

سديى الفاضل فاروق


انا مع رأى حضرتك ممكن الموضوع يفشل وممكن ينجح زى اى حاجه او بمعنى ادق زى اى مشروع هناك نسبة فشل وهناك ايضا نسبة نجاح بس يمكن المخاطر فى هذا الموضوع بتكون عاليه شويه لانه بيعتمد على اسس قد تكون فى بعض الاحيان واهيه ومخادعه وكذاااااابه
طبعا الموضوع انه يحصل مقابله خارج المنزل انا مش ذكرته كل ما ذكرته هو ازاى يقدر يتقدم للبنت هيقول عرفها ازاى والبنت هتقول لاهلها ايه كمان

الله المستعان وربنا يوفق الجميع
اشكرك لحضرتك تشريفك لنا

أم الخــلـود يقول...

(حملة الجسد الواحد)

أرجوا من المدونين الموقرين أن يضعوا شعار الحملة في الشريط الجانبي لمدوناتهم تضامنا مع أمة محمد !!

صورة الشعار .. في مدونتي كركر .. ويكتبون فوقها ..

(حملة الجـسد الواحـد)

رابط المدونة

http://krkr111.blogspot.com

جعله الله في ميزان حسانتكم .. آمين

(ست* جنى* الحسن) يقول...

سلامو عليكو..
انا رأى ان ما بنى على باطل فهو باطل.
واللى ميقدرش يقول مايعملش.
يعنى لا هى ولا هو يقدر حد فيهم يقول علرف التانى منين وازاى طيب وبعدين؟؟؟
وصلنا لمفترق طرق .........
وانا اعرف حالات اتعرفو عن طريق النت
واتخطبو ومكملوش.
لان الحرام بين والحلال بين.
والله المستعان
لك تحياتى

ذكري رحيل قلم يقول...

السلام عليكم
الي

ليلة شتاء

ازيكياجميلة اخبارك ايه بطمن عليك كده وبدون مقدمات تسيبينا
ربنا معاكي
ويسر لك الحال ان شاء الله

دمتي بحب

sun of free dom يقول...

الحب عالنت شىئ غريب اوى
ومش واضح
اعتقد انه تسلية
مدونتك رائعة بالتوفيق

موجة يقول...

بوست رائع
تسرني زيارتك
موجة

بنت وولد يقول...

طب ما هيا ايوه اتكلمت مع غيره بس محبتش غير هوه بس و متمنتش ترتبط غير بيه هوه
مش عيب الارتباط عن طريق النت
انا شايفه انه ميفرقش عن اللى بيدوا صورهم للخاطبه عشان تجيبلهم عرسان

و بعدين ماهما حيتقابلوا فى اطار الاسرتين و لو فيه اختلافات او اعتراضات اكيد حتبان

الشـوكة الــنـاعـمـة يقول...

ردا على تعليقكك ليا
انا مش بقول بيدوا حياتهم بكدبه ما هما كده بدءوها غلط
ازاى اصلا احب واصدق واحد بيكلمنى من ورا شاشه
بس ياستى لو كان حتما ولابد
يبدءوها بكدبه عشان يكملوا بعد كده صح
وبعدين لما يبقوا مع بعض يقولوا الحقيقه
الموضوع من اوله غلط عشان كده كل الحلول تقريبا صعبه ومشبوهه

ليس فقيرا من يحب يقول...

ازيكم يا بشررررررررررررررر
حلو اوى الموضوع ده يا زهراء

انا اتكلم عن نفسى كبنت انا معنديش اى مشكله مثلا ان اروح اقول لابويا وامى واخواتى انا حد عايز يتقدملى وعرفته نت لانها تقريبا حصلت كتير وحاجه مش صعبه طالما الناس هتمشى بالخطوات الطبيعيه وهتسأل عن العريس المتقدم واهله والموضوع عادى
بس دا على حسب نوعيه تفكير الاهل وممكن يتقبلو الموضوع ده ولا ممكن الموضوع يبوظ لحظه معرفتهم بموضوع النت ده
كل واحد طبعا ادرى باهله وتفكيرهم
لو حد عارف ان اهله لو عرفو موضوع النت ده الموضوع هيتفشكل يبقى ممكن يعنى يخترعو اى حاجه زى واحد صاحبه اوزميله فى الشغل قاله عليها ولااى حاجه وبعد كده هو طبيعى الموضوع هيمشى
زيه زى اى موضوع

وفى الاخر كل واحد بياخد نصيبه ومكتوبه بس باى طريقه ولاى سبب
بس لازم كل واحد يشغل مخه كويس ويفكر بعقله مع قلبه ويحافظ على نفسه قووووووووى لان زى ما فى ناس كويسه جدا فى ناس وحشه لابعد مدى

مبروووك المدونه الجديده

ربنا يسعدكم جميييعا